Asiste a un dos nosos cursos

A continuación móstranse as actividades formativas que se realizan periodicamente, e toda a información asociada sempre que estean abertas as convocatorias:

 

XORNADAS DE VOLUNTARIADO AMBIENTAL NA ILLA DE CORTEGADA

Data e horario: Sábado e domingo, 23 e 24 de novembro de 2024. 

09:30 horas: embarque no porto de Carril. Chegada á Illa de Cortegada e realización de actividades de limpeza de praias e lixo mariño.

12:00 horas.: Descanso.

12:30 horas: Ruta interpretativa.

14:30 horas. Remate da xornada.

Lugar: Illa de Cortegada. Embarque no porto de Carril.

            Prazas: 20. Inscrición previa: https://forms.gle/BJW1DF7gjvxoSrw7A

 

 

 

XORNADAS DE DIVULGACIÓN Á CIDADANÍA

COÑECE O TEU PARQUE NACIONAL

Sálvora. A traxedia do vapor-correo Santa Isabel.
Memoria do naufraxio do Titanic galego

O Parque Nacional Marítimo-Terrestre das Illas Atlánticas de Galicia (PNMTIAG) anuncia unha nova xornada na que poderás coñecer, polo miúdo, que aconteceu na traxedia do vapor-correo Santa Isabel.
Na ría de Arousa atópase o arquipélago de Sálvora, que forma parte do PNMTIAG. Este arquipélago tamén está formado por illas máis pequenas como Noro, Vionta ou Sagres e por multitude de pequenos illotes menores e baixos que dificultan a navegación. Un deses baixos, Pedra da Pegar, é tristemente famoso por ser o lugar onde embarrancou o Santa Isabel.
Nesta charla, da man do cronista oficial de Ribeira, Xosé María Fernández Pazos afondaremos no relato dos feitos, as emocións e as vidas dos que estiveron involucrados na catástrofe.
Obxectivos: Divulgar o acontecido na traxedia do Santa Isabel. Proporcionar datos relevantes e de interese histórico obtidos nas investigacións do naufraxio.
Relator: Xosé María Fernández Pazos. Cronista Oficial de Ribeira. Historiador e xornalista.
Data e horario: Venres. 15 de novembro. 19:30 a 20:30
Lugar: Sala Polivalente do Auditorio (novo). Ribeira. A Coruña.
Prazas: Ata completar aforo (120 persoas).

 

Fundamentos para iniciarse na observación da natureza

O Parque Nacional Marítimo-Terrestre das Illas Atlánticas de Galicia (PNMTIAG) anuncia unha nova xornada de divulgación, dividida en dúas fases, dedicada a coñecer os principios que debemos ter en conta para iniciarmonos na observación da natureza.

Na xornada do sábado, fase teórica, achegarémonos ao mundo naturalista. Descubriremos como observar, identificar e rexistrar a diversidade de seres vivos que nos rodea, centrándonos na biodiversidade terrestre presente no PNMTIAG.

Aprenderemos pequenas nocións que debemos ter en conta na observación de diferentes grupos biolóxicos, abarcando dende invertebrados como a vacaloura ata os mamíferos, pasando tamén polo menos coñecido mundo das plantas.

Durante o domingo, fase práctica, poderemos camiñar polas Illas Cíes, gozar e familiarizarnos coa riqueza dos seus hábitats e da diversidade de especies que neles viven. Observaremos formacións vexetais de gran interese, como as que habitan nos cordóns dunares, cantís rochosos e matogueiras, abarcando tamén a problemática das especies exóticas invasoras e tentando localizar algúns dos animais que habitan nesta illa.

Obxectivos: Proporcionar información útil para iniciarse na observación da natureza. Dar a coñecer hábitats e especies de especial interese que habitan no PNMTIAG.

Relator: Miguel Ángel Fernández Martínez. Ecoplanin S.L.

Datas, horarios e lugar: Sábado. 23 de novembro. 10:00 a 13:00. Fase teórica. Sede do PNMTIAG. Domingo 24 de novembro. 10:00 a 15:00. Fase práctica nas Illas Cíes. Embarque no porto de Vigo.

Prazas: 40. Inscrición finalizada.

Recomendacións:

• Usa roupa e calzado cómodo para camiñar e  axeitado segundo a previsión meteorolóxica.

• Lleva a comida e bebida que necesites.

 

Mergullándonos no Parque Nacional Marítimo-Terrestre das Illas Atlánticas de Galicia

O Parque Nacional Marítimo-Terrestre das Illas Atlánticas de Galicia (PNMTIAG) anuncia unha nova xornada de divulgación para dar a coñecer os seus fondos mariños.

O sábado, fase teórica, mergullarémonos no medio mariño do PNMTIAG e os seus tesouros escondidos. Percorreremos as augas que rodean os arquipélagos de Cíes, Ons, Sálvora e Cortegada, explorando os seus impresionantes bosques submarinos de algas pardas, os fondos de maërl e de fanerógamas mariñas que albergan unha rica biodiversidade.

Aprenderemos sobre a importancia destes ecosistemas e por que a súa conservación é crucial para manter o equilibrio ecolóxico e a riqueza mariña.

O domingo será o momento da fase práctica. Durante a visita ás illas Cíes observaremos, desde terra, as zonas onde se atopan estes valiosos ecosistemas mariños. Descubriremos como o parque nacional desempeña un papel fundamental na conservación do medio mariño de Galicia, protexendo hábitats de interese comunitario e regulando actividades para garantir o seu desenvolvemento sostible. Esta experiencia permitiranos comprender a estreita relación entre os ecosistemas terrestres e mariños, e a importancia de preservar este tesouro natural para as xeracións futuras.

Obxectivos: Sensibilizar sobre a importancia da conservación dos ecosistemas mariños do PNMTIAG. Comprender que a conservación do fondo mariño é unha peza chave para o desenvolvemento sostible. Fomentar o coñecemento e apreciación do patrimonio natural do PNMTIAG.

Relatora: Cristina Piñeiro Corbeira. BioCost Research Group. Facultade de Ciencias. Univ. de A Coruña.

Datas, horarios e lugar: Sábado. 23 de novembro. 16:00 a 19:00. Fase teórica. Sede do PNMTIAG en Vigo. Domingo 24 de novembro. 10:00 a 15:00. Fase práctica nas Illas Cíes. Embarque no porto de Vigo.

Prazas: 40. Inscrición finalizada.

Recomendacións:

• Usa roupa e calzado cómodo para camiñar e  axeitado segundo a previsión meteorolóxica.
• Lleva a comida e bebida que necesites.

 

Arqueoloxía no Parque Nacional Marítimo-Terrestre das Illas Atlánticas de Galicia (PNMTIAG)

O PNMTIAG anuncia unha nova xornada de divulgación, na que a cidadanía poderá coñecer o seu patrimonio arqueolóxico, terrestre e subacuático.

As investigacións arqueolóxicas realizadas permiten obter información valiosa para poder afondar no coñecemento que se ten sobre a historia e a ocupación humana dos seus arquipélagos. Grazas a estes traballos arqueolóxicos executados nos últimos anos, podemos "reconstruír" parte da historia, modo de vida e costumes dos seus primeiros habitantes.

Un balance de catro anos de proxectos arqueolóxicos no PNMTIAG

Relatoras: Patricia Valle Abad e Nerea Ruanova Álvarez. Investigadoras arqueólogas do grupo GEAAT. Universidade de Vigo.

Data e horario: Sábado. 30 de novembro. 10:00 a 11:30 horas.

Arqueoloxía subacuática no PNMTIAG. Realidades e perspectivas

Relator: Miguel San Claudio Santa Cruz. Doutor en Ciencias da Antigüidade.

Data e horario: Sábado. 30 de novembro. 12:00 a 13:30 horas.

Lugar: Auditorio da sede do PNMTIAG en Vigo.

Obxectivos: Dar a coñecer as investigacións arqueolóxicas terrestres e subacuáticas realizadas nos distintos arquipélagos do PNMTIAG. Divulgar os resultados obtidos e o seu contexto histórico.

Prazas: 65. Inscrición previa. https://forms.gle/xfYeYsuboKJ3pLRz8

 

Cortegada no tempo

O Parque Nacional Marítimo-Terrestre das Illas Atlánticas de Galicia (PNMTIAG) anuncia unha nova xornada de divulgación, na que a cidadanía poderá descubrir os eventos históricos máis destacados que aconteceron na illa de Cortegada.

A illa de Cortegada está ateigada de historia, moita e ben coñecida a través das investigacións realizadas e da documentación atopada. Outra parte, aínda está por descubrir ou corroborar.

Achégate a esta charla, da man do xestor do patrimonio cultural, Marcelino Abuín Duro, para descubrir os principais acontecementos históricos que, ao través do tempo, marcaron e deron orixe a identidade e carácter da actual illa de Cortegada.

Obxectivos: Dar a coñecer os principais acontecementos históricos que marcaron a identidade da illa de Cortegada.

Relator: Marcelino Abuín Duro. Xestor do patrimonio cultural.

Data e horario: Sábado, 30 de novembro, de 18:00 a 19:30 horas.

Lugar: Sede da Asociación Gato Negro. Carril.

Prazas: Ata completar aforo.

Achegamento á micoloxía no Parque Nacional Marítimo-Terrestre das Illas Atlánticas de Galicia (PNMTIAG)

O PNMTIAG anuncia unha nova xornada de divulgación, na que a cidadanía poderá achegarse para descubrir uns dos grupos de seres vivos menos coñecidos, os fungos.

Nesta xornada achegarémonos a micoloxía da man de dous micólogos, Jaime Bernardo Blanco Dios e Miguel Ángel Lameiro Rios. Na primeira parte ou fase teórica, falaremos de que son os fungos, como viven, como se identifican, a súa importancia ecolóxica e o deber de protexelos e conservalos. Posteriormente, na fase práctica, poderemos observar diferentes especies de fungos na illa de Cortegada, onde se levan rexistradas máis de 800 especies diferentes, moitas delas moi pequenas e discretas, pero de gran valor científico e para o ecosistema.

Obxectivos: Sensibilizar sobre a importancia dos fungos nos ecosistemas. Descubrir algunhas das especies presentes na illa de Cortegada.

Relatores: Jaime Bernardo Blanco Dios. Presidente da Asociación Micolóxica Brincabois. Membro do Grupo Micolóxico Galego. Miguel Ángel Lameiro Rios. Membro da Asociación Micolóxica Brincabois..

Data, horario e lugar: Domingo, 1 de decembro. De 10:00 a 11:30 horas. Fase teórica. Sede da Asociación Gato Negro. Carril. De 12:00 a 15:00 horas. Fase práctica na illa de Cortegada. Embarque no porto de Carril. Inclúe pequeno xantar.

Prazas: 40. Inscrición finalizada.

Recomendacións:

• Usa roupa e calzado cómodo para camiñar e  axeitado segundo a previsión meteorolóxica.

OUTROS CURSOS 

• Xornadas de estudo e investigación no GAIMTNP. 
• Curso de formación para guías na Rede de Parques Nacionais (Parque Nacional das Illas Atlánticas).
• Formación para profesionais do sector turístico sobre a contorna GAIMTNP. 
• Curso de formación para profesionais dos medios sobre os activos e xestión de GAIMTNP.
• "Dominio público mariño-terrestre nos parques nacionais", para persoal da Garda Civil.