Programa educativo | Parque Nacional marítimo-terrestre das Illas Atlánticas de Galicia

A conservación deste espazo é tarefa de toda a sociedade, velaí a importancia do seu coñecemento e a súa posta en valor.

Dende o Parque Nacional consideramos prioritario achegar os seus valores ó público escolar, especialmente a aqueles da contorna máis próxima a estes arquipélagos.

Con este fin, o equipo de Uso Público do Parque Nacional ten deseñado actividades didácticas dende os ciclos de Infantil ata Secundaria, Bacharelato e Formación profesional, que describimos a continuación e nas que lles convidamos a participar.

Para participar debe cubrirse a Solicitude de actividades didácticas do Parque Nacional

Actividades didácticas

Título	Para quen?	De que queremos falarvos?	Como o imos facer?
MARTIÑO, O CORVO MARIÑO	Para 6º curso de E. Infantil e 1º curso de E. Primaria	Das paisaxes das illas do Parque Nacional. Da vida mariña e terrestre das illas e as especies presentes en cada unha. Do corvo mariño cristado, especie en perigo.	Realizaranse diversas dinámicas participativas: Os amigos de Martiño: xogo sobre as especies que habitan as illas. Onde vive Martiño?: amosaranse as paisaxes das illas. A vida de Martiño: contaconto sobre a vida dun corvo mariño.
AS ILLAS: PEZA A PEZA	Para 2º e 3º de E. Primaria	Dos catro arquipélagos do Parque Nacional. Dos fondos mariños que rodean as illas. Das plantas e animais do Parque.Dos ecosistemas do Parque. Das xentes que habitaron ou habitan as illas.	Dun xeito didáctico, participativo e espertando a curiosidade polas illas. A actividade estará dividida en: Presentación do parque e das súas paisaxes: apoiado en imaxes. O rastro das especies: Un xogo no que deberán identificar distintos rastros de seres vivos (cunchas, plumas...) e escoller o ecosistema máis axeitado para cada especie.
RUMBO ÁS ILLAS	Para 4º,5º e 6º de E. Primaria	Dos catro arquipélagos do Parque Nacional. Dos fondos mariños que rodean as illas. Dos distintos ecosistemas que hai no Parque . Das adaptacións de animais e plantas. Da historia e costumes dos habitantes.	Empregando ferramentas didácticas e participativas para dar a coñecer os valores naturais e patrimoniais do Parque. A actividade estará dividida en: Presentación do parque e os seus ecosistemas: apoiado en paneis, imaxes e dinámicas grupais. Cada cousa no seu sitio: dinámica na que terán que adiviñar o hábitat de diversas especies a través de pistas.
DETECTIVES DA PRAIA (obradoiro)	De 1º a 6º de Ed. Primaria	Dos catro arquipélagos do P. Nacional Dos fondos mariños que rodean as illas. Dos seres vivos mariños.	Dun xeito didáctico e participativo, con elementos reais que podemos atopar nas praias da nosa contorna. Veremos restos que aparecen nas praias e identificaremos os seres vivos aos que pertencen. Contaremos curiosidades sobre eles e adiviñaremos en que tipo de fondo viven.
MERGULLÁNDONOS NAS ILLAS	Para ciclos da ESO, Bacharelato e FP	Das paisaxes das illas do Parque Nacional. Das causas da alta riqueza mariña neste espazo protexido. Da vida mariña das illas.	Realizando diversas dinámicas participativas: As illas do Parque Nacional: presentación do espazo protexido. Por qué a auga é tan rica: experimentos sobre a dinámica mariña nas illas. A vida nos fondos: identificación da biodiversidade nas paisaxes mariñas do parque.

Lugar de celebración das actividades

Ofrecemos a posibilidade de acoller no noso Centro de Visitantes a grupos de estudantes e realizar aquí estas actividades. Tamén que o equipo de guías do Parque se desprace ata o centro escolar para desenvolver a actividade didáctica cos alumnos. Neste caso, a actividade realizarase por grupos nas propias aulas ou naquelas estancias que dispoñan dos recursos necesarios para a súa realización.

O máximo de alumnos por sesión non poderá superar o aforo permitido no centro de visitantes. Nos centros educativos a actividade farase por aula.

Apoio en proxectos escolares con temáticas relacionadas coas Illas Atlánticas

Moitos centros realizan interesantes proxectos escolares relacionados coas Illas Atlánticas, os espazos protexidos, o mar...

Convidamos especificamente a estes centros a poñerse en contacto connosco para estudar posibles formas de colaboración do Parque Nacional con estes proxectos, a través de charlas, rutas ou actividades no centro escolar, no Centro de Visitantes ou nas illas, que poidan enriquecelos e achegar o Parque Nacional e os seus valores aos escolares da nosa contorna.

Neste caso deben cubrir a Solicitude de actividades asistidas por Guías do Parque Nacional