Participa nas actividades do Parque

Cíes - Itinerarios guiados
Cíes - Itinerarios guiados

A valorización deste espazo protexido depende en gran medida de que a información que se divulga sobre el sexa veraz e pertinente. Por iso realízase un importante esforzo en xestionar esa información e presentala ao público a través de distintos formatos (talleres para nenos, proxeccións, charlas, formación de empresas con actividade no parque etc...) contando, na medida do posible, con persoal experto ou profesionais do ámbito. 

 Relación de actividades que realizamos: 

  • Rutas guiadas gratuítas nas illas durante os meses de verán. Este verán ofrécense rutas guiadas cos guías propios do Parque nos catro arquipélagos. Este servizo é de balde (pero non o transporte á illa). En Cíes e Ons, fanse a diario. En Cortegada os domingos e en Sálvora os luns de xullo e agosto. A súa realización supedítase ás condicións meteorolóxicas e organizativas. No caso de Sálvora e Cortegada hai que reservar praza a través da web: www.reservasparquesnacionales.es. No caso de Cíes e Ons, pódese apuntar presencialmente nas casetas de información do parque nas illas o día da visita (ata cubrir prazas), ou ben reservar praza previamente para a ruta que se ofrece ás 12h nesa web nun día determinado (os xoves no caso de Cíes, e os mércores no caso de Ons).
  • Rutas  "Descubrindo o Parque Nacional". Este programa quere facilitar a visita ás illas fora da tempada de alta e dun xeito ordenado e sostible, da man dos guías propios do Parque Nacional. Estas rutas fanse con grupos reducidos coa fin de poder ofrecer a máxima calidade de visita a este espazo protexido. 

  • Actividades para grupos organizados. O equipo de uso público do parque nacional, formado por 6 guías intérpretes, ofrece a posibilidade de concertar o servizo de guías para actividades relacionadas co parque, ben sexa a realización dunha visita guiada, a realización de charlas, participación en eventos divulgativos etc., e que sexan solicitadas por entidades sen ánimo de lucro. A solicitude deste servizo realízase mediante formulario e fóra da tempada de atención en illas (Semana Santa e do 15 de maio ao 15 de setembro). 
  • Charlas e obradoiros de carácter divulgativo,  no Centro de Visitantes do Parque en Vigo ou nas illas. 
  • Actividades recreativas nas illas: durante a tempada alta diversas empresas solicitan autorización do Parque para realizar actividades de turismo activo en Cíes e Ons. Estas actividades son o snorkel, bautizos de submarinismo e kayak. É recomendable informarse antes de realizar a visita ou nas casetas de Información en Cíes e Ons.